Mantra 1
रात्री॑ मा॒ता नभः॑ पि॒तार्य॒मा ते॑ पिताम॒हः। सि॑ला॒ची नाम॒ वा अ॑सि॒ सा दे॒वाना॑मसि॒ स्वसा॑ ॥
रात्री॑ । मा॒ता । नभ॑: । पि॒ता । अ॒र्य॒मा । ते॒ । पि॒ता॒म॒ह: । सि॒ला॒ची । नाम॑ । वै । अ॒सि॒ । सा । दे॒वाना॑म् । अ॒सि॒ । स्वसा॑ ॥५.१॥
Mantra 2
यस्त्वा॒ पिब॑ति॒ जीव॑ति॒ त्राय॑से॒ पुरु॑षं॒ त्वम्। भ॒र्त्री हि शश्व॑ता॒मसि॒ जना॑नां च॒ न्यञ्च॑नी ॥
य: । त्वा॒ । पिब॑ति । जीव॑ति । त्राय॑से । पुरु॑षम् । त्वम् । म॒र्त्री । हि । शश्व॑ताम् । असि॑ । जना॑नाम् । च॒। नि॒ऽअञ्च॑नी । ५.२॥
Mantra 3
वृ॒क्षंवृ॑क्ष॒मा रो॑हसि वृष॒ण्यन्ती॑व क॒न्यला॑। जय॑न्ती प्रत्या॒तिष्ठ॑न्ती॒ स्पर॑णी॒ नाम॒ वा अ॑सि ॥
वृ॒क्षम्ऽवृ॑क्षम् । आ । रो॒ह॒सि॒ । वृ॒ष॒ण्यन्ती॑ऽइव । क॒न्यला॑ । जय॑न्ती । प्र॒ति॒ऽआ॒तिष्ठ॑न्ती । स्पर॑णी । नाम॑ । वै । अ॒सि॒ ॥५.३॥
Mantra 4
यद्द॒ण्डेन॒ यदिष्वा॒ यद्वारु॒र्हर॑सा कृ॒तम्। तस्य॒ त्वम॑सि॒ निष्कृ॑तिः॒ सेमं निष्कृ॑धि॒ पूरु॑षम् ॥
यत् । द॒ण्डेन॑ । यत् । इष्वा॑ । यत् । वा॒ । अरु॑: । हर॑सा । कृ॒तम् । तस्य॑ । त्वम् । अ॒सि॒ । नि:ऽकृ॑ति: । सा । इ॒मम् । नि: । कृ॒धि॒। पुरु॑षम् ॥५.४॥
Mantra 5
भ॒द्रात्प्ल॒क्षान्निस्ति॑ष्ठस्यश्व॒त्थात्ख॑दि॒राद्ध॒वात्। भ॒द्रान्न्य॒ग्रोधा॑त्प॒र्णात्सा न॒ एह्य॑रुन्धति ॥
भ॒द्रात् । प्ल॒क्षात् । नि: । ति॒ष्ठ॒सि॒ । अ॒श्व॒त्थात् । ख॒दि॒रात् । ध॒वात् । भ॒द्रात् । न्य॒ग्रोधा॑त् । प॒र्णात् । सा । न॒: । आ । इ॒हि॒ । अ॒रु॒न्ध॒ति॒ ॥५.५॥
Mantra 6
हिर॑ण्यवर्णे॒ सुभ॑गे॒ सूर्य॑वर्णे॒ वपु॑ष्टमे। रु॒तं ग॑च्छासि निष्कृते॒ निष्कृ॑ति॒र्नाम॒ वा अ॑सि ॥
हिर॑ण्यऽवर्णे । सुऽभ॑गे । सूर्य॑ऽवर्णे । वपु॑:ऽतमे । रु॒तम् । ग॒च्छा॒सि॒ । नि॒:ऽकृ॒ते॒ । नि:ऽकृ॑ति: । नाम॑ । वै । अ॒सि॒ ॥५.६॥
Mantra 7
हिर॑ण्यवर्णे॒ सुभ॑गे॒ शुष्मे॒ लोम॑शवक्षणे। अ॒पाम॑सि॒ स्वसा॑ लाक्षे॒ वातो॑ हा॒त्मा ब॑भूव ते ॥
हिर॑ण्यऽवर्णे । सुऽभ॑गे । शुष्मे॑ । लोम॑शऽवक्षणे । अ॒पाम् । अ॒सि॒ । स्वसा॑ । ला॒क्षे॒ । वात॑: । ह॒ । आ॒त्मा । ब॒भू॒व॒ । ते॒ ॥५.७॥
Mantra 8
सि॑ला॒ची नाम॑ कानी॒नोऽज॑बभ्रु पि॒ता तव॑। अश्वो॑ य॒मस्य॒ यः श्या॒वस्तस्य॑ हा॒स्नास्यु॑क्षि॒ता ॥
सि॒ला॒ची । नाम॑ । का॒नी॒न: । अज॑ऽबभ्रु । पि॒ता । तव॑ । अश्व॑: । य॒मस्य॑ । य: । श्या॒व: । तस्य॑ । ह॒ । अ॒स्ना । अ॒सि॒ । उ॒क्षि॒ता ॥५.८॥
Mantra 9
अश्व॑स्या॒स्नः संप॑तिता॒ सा वृ॒क्षाँ अ॒भि सि॑ष्यदे। स॒रा प॑तत्रिणी भू॒त्वा सा न॒ एह्य॑रुन्धति ॥
अश्व॑स्य । अ॒स्न:। सम्ऽप॑तिता । सा । वृ॒क्षान् । अ॒भि । सि॒स्य॒दे॒ । स॒रा । प॒त॒त्रिणी॑ । भू॒त्वा। सा । न॒: । आ । इ॒हि॒ । अ॒रु॒न्ध॒ति॒ ॥५.९॥
