Mantra 1
आ॑ङ्गिर॒साना॑मा॒द्यैः पञ्चा॑नुवा॒कैः स्वाहा॑ ॥
आ॒ङ्गि॒र॒साना॑म्। आ॒द्यैः। पञ्च॑। अ॒नु॒ऽवा॒कैः। स्वाहा॑ ॥२२.१॥
Mantra 2
ष॒ष्ठाय॒ स्वाहा॑ ॥
ष॒ष्ठाय॒। स्वाहा॑ ॥२२.२॥
Mantra 3
स॑प्तमाष्ट॒माभ्यां॒ स्वाहा॑ ॥
स॒प्त॒म॒ऽअ॒ष्ट॒माभ्या॑म्। स्वाहा॑ ॥२२.३॥
Mantra 4
नी॑लन॒खेभ्यः॒ स्वाहा॑ ॥
नी॒ल॒ऽन॒खेभ्यः॑। स्वाहा॑ ॥२२.४॥
Mantra 5
ह॑रि॒तेभ्यः॒ स्वाहा॑ ॥
ह॒रि॒तेभ्यः॑। स्वाहा॑ ॥२२.५॥
Mantra 6
क्षु॒द्रेभ्यः॒ स्वाहा॑ ॥
क्षु॒द्रेभ्यः॑। स्वाहा॑ ॥२२.६॥
Mantra 7
प॑र्यायि॒केभ्यः॒ स्वाहा॑ ॥
प॒र्या॒यि॒केभ्यः॑। स्वाहा॑ ॥२२.७॥
Mantra 8
प्र॑थ॒मेभ्यः॑ श॒ङ्खेभ्यः॒ स्वाहा॑ ॥
प्र॒थ॒मेभ्यः॑। श॒ङ्खेभ्यः॑। स्वाहा॑ ॥२२.८॥
Mantra 9
द्वि॒तीये॑भ्यः श॒ङ्खेभ्यः॒ स्वाहा॑ ॥
द्वि॒ती॒येभ्यः॑। श॒ङ्खेभ्यः॑। स्वाहा॑ ॥२२.९॥
Mantra 10
तृ॒तीये॑भ्यः श॒ङ्खेभ्यः॒ स्वाहा॑ ॥
तृ॒ती॒येभ्यः॑। श॒ङ्खेभ्यः॑। स्वाहा॑ ॥२२.१०॥
Mantra 11
उ॑पोत्त॒मेभ्यः॒ स्वाहा॑ ॥
उ॒प॒ऽउ॒त्त॒मेभ्यः॑। स्वाहा॑ ॥२२.११॥
Mantra 12
उ॑त्त॒मेभ्यः॒ स्वाहा॑ ॥
उ॒त्ऽत॒मेभ्यः॑। स्वाहा॑ ॥२२.१२॥
Mantra 13
उ॑त्त॒रेभ्यः॒ स्वाहा॑ ॥
उ॒त्ऽत॒रेभ्यः॑। स्वाहा॑ ॥२२.१३॥
Mantra 14
ऋ॒षिभ्यः॒ स्वाहा॑ ॥
ऋ॒षिऽभ्यः॑। स्वाहा॑ ॥२२.१४॥
Mantra 15
शि॒खिभ्यः॒ स्वाहा॑ ॥
शि॒खिऽभ्यः॑। स्वाहा॑ ॥२२.१५॥
Mantra 16
ग॒णेभ्यः॒ स्वाहा॑ ॥
ग॒णेभ्यः॑। स्वाहा॑ ॥२२.१६॥
Mantra 17
म॑हाग॒णेभ्यः॒ स्वाहा॑ ॥
म॒हा॒ऽग॒णेभ्यः॑। स्वाहा॑ ॥२२.१७॥
Mantra 18
सर्वे॒भ्योऽङ्गि॑रोभ्यो विदग॒णेभ्यः॒ स्वाहा॑ ॥
सर्वे॑भ्यः। अङ्गि॑रःऽभ्यः। वि॒द॒ऽग॒णेभ्यः॑। स्वाहा॑ ॥२२.१८॥
Mantra 19
पृ॑थक्स॒ह॒स्राभ्यां॒ स्वाहा॑ ॥
पृ॒थ॒क्ऽस॒ह॒स्राभ्या॑म्। स्वाहा॑ ॥२२.१९॥
Mantra 20
ब्र॒ह्मणे॒ स्वाहा॑ ॥
ब्र॒ह्मणे॑। स्वाहा॑ ॥२२.२०॥
Mantra 21
ब्रह्म॑ज्येष्ठा॒ सम्भृ॑ता वी॒र्याणि॒ ब्रह्माग्रे॒ ज्येष्ठं॒ दिव॒मा त॑तान। भू॒तानां॑ ब्र॒ह्मा प्र॑थ॒मोत ज॑ज्ञे॒ तेना॑र्हति॒ ब्रह्म॑णा॒ स्पर्धि॑तुं॒ कः ॥
ब्रह्म॑ऽज्येष्ठा। सम्ऽभृ॑ता। वी॒र्या᳡णि। ब्रह्म॑। अग्रे॑। ज्येष्ठ॑म्। दिव॑म्। आ। त॒ता॒न। भू॒ताना॑म्। ब्र॒ह्मा। प्र॒थ॒मः। उ॒त। ज॒ज्ञे॒। तेन॑। अ॒र्ह॒ति॒। ब्रह्म॑णा। स्पर्धि॑तुम्। कः ॥२२.२१॥
